خواطر صعيدي مهمش بعد الثورة

بقول الحق من يومي

ولا اعرفشي طريق اعوج

ولا بخلف ولا بكدب

ولا بشجب ولا بندد

غير لما يضروني

ولو في يوم هيئذوني

أنا بقلب وبتمرد

وبعمل فيها مية مارد

وبعاند .. لو ناويين يعاندوني

*****

صعيدي وراضي بهمومي

وقلبي عمره ما بيسمح

ولا جوارحي

بحد يدوس على وطني

ويتفلسف

ويعمل فيها ستين فاهم

ويتحايل على بساطي

أنا فاهم

وعارف إن كلمة حق

بتهدم ألف كلمة كدب

وتشنقها

وتعملها مدرسة وعبره

وتقتل بيها أحزاني

*****

صعيدي وابويا رباني

على الضحكة في وش اصحابي

واحبابي

وأي حد معدنه طيب

وبطيب خواطر اللي عاداني

لكن عمري ما بسمح

 ولا بسامح

حد في يوم غدر بيَّ

وكرر كدبته عليَّ

وعلى غشه صحاني

*****

صعيدي ومخي جواني

وغيري مخه براني

لا بيفكر ولا يفرق

ولا بيعرف اصول عيبه

وكله عنده سبوبه

ولو يعرف بساطة حالي

حتى اللقا ما يلقاني

******

صعيدي وكتيرظلموني

 وجرحوني

وخدعوني

ووهموني

وخلوني اصدق

كدب ايامهم

واحلامهم

وافلامهم

وخلوني

 اصدق كدبهم باسم الوطن

وباسم الوطن باعوني

*****

صعيدي وحقي مش ناسي

فلول نظامهم أذت ناسي

وآذتني وخلتني

ادخل حرب على حقي

وهو الحق بعد الثورة والشداء

هندخل حرب علشانه!!!!

دي تبقى مصيبة

وتدبيسة

وتلبيسة

وشيء ما خطرش على بالي

*****

فلولهم دي لازم تمشي

ولا الثورة ما كملتشي؟؟

ولا صوتي مش جايب همه؟؟

وتصويتي على الثورة؟؟ سيبك منه؟؟

وتصويتي لصالح مرسي

وقلت شفيق لازم يمشي

ومشيته

وخليته

يشوفني كابوس

غلان على راسه بدوس

وفي الآخر برضه فلول بتحكمني

وتذلني وتحاكمني؟؟

طاب الثورة لازم تكمل وتتكمل

وترحل كل اشكالهم

واشوف حالي

*****

صعيدي وتم تهميشي

وتفليسي

وتغريبي

وتجريدي

وتصفيتي ربيع عمري

ولسه باقي حقاني

صعيدي وعشت تهمشي

على الميا وأمراضها

ومستشفى خراب دارها

ونور السد يتحايل

ويتمايل

وبيضعف ساعة وساعات يفصل

تصور...

 نور السد يتصدر

وانا عايش على الضلمة

في اوطاني

بقلم: محمد عمر الناظر